Бизнес өз құқығын қорғады: ШҚО стоматология клиникасы пайдасына 16,5 млн теңге көлемінде шешім қабылданды
Шығыс Қазақстан облыстық сотының азаматтық істер жөніндегі сот алқасы Әлеуметтік медициналық сақтандыру қоры мен «Аль-Дента» ЖШС арасындағы резонансты дауда бизнес пайдасына шешім шығарды. Нәтижесінде кәсіпкерлердің құқықтары шамамен 16,5 миллион теңгеге қорғалып, бірінші инстанциядағы сот шешімі бұзылды.
Бұл мәселемен – «негізсіз байыту» туралы талаптармен және ірі сомаларды өндіріп алу әрекеттерімен – ШҚО Кәсіпкерлер палатасына өңірдегі бірнеше стоматологиялық клиника жүгінген болатын. Бизнес өкілдері Қордың жылдар бойы қолданыстағы келісімшарттар мен тарифтер бойынша төленіп келген анестезия қызметтерін кенеттен «қосарланған төлем» деп танып, претензия қоя бастағанын хабарлады.
Кәсіпкерлер палатасы клиникалардың өтініштерін мұқият сүйемелдеп, нормативтік актілерді және сот материалдарын зерттеді, себебі мұндай талаптар өңірдегі бүкіл стоматологиялық сектор үшін тәуекелдер тудырды.
Әлеуметтік медициналық сақтандыру қоры анестезия қызметтері негізсіз төлемге қойылды деп есептеп, компаниядан 16,5 млн теңге өндіріп алуды талап етті. Сонымен қатар:
• қызметтер 2023 жылға арналған қолданыстағы келісімшарт аясында көрсетілген;
• орындалған жұмыс актілері екі тараппен де қол қойылған;
• Қор 2021, 2022, 2023 және 2024 жылдары көрсетілген қызметтерді қабылдап, төлеген;
• талапкер сілтеме жасаған Денсаулық сақтау министрлігінің түсіндірмелері ресми нормативтік түсіндіру мәртебесіне ие емес.
Апелляциялық алқа бірінші инстанция сотының құқық нормаларын дұрыс қолданбағанын және талап қою шегінен шығып кеткенін анықтады. Соттың негізгі тұжырымы: қолданыстағы келісімшарт болған кезде дауды «негізсіз байыту» ретінде қарастыруға болмайды. Мұндай жағдайларда талапкер «негізсіз байыту» емес, залалды өндіру туралы талап қоюы тиіс.
Осылайша, сот 16 млн теңгені өндіріп алу үшін құқықтық негіз болмағанын мойындады.
ШҚО Кәсіпкерлер палатасы атап өткендей, облыстық соттың бұл шешімі МӘМС жүйесінде жұмыс істейтін барлық медициналық ұйымдар үшін маңызды. Ол келесілерді растайды: келісімшарт талаптарын екі тараптың да міндетті түрде сақтауы; құқықтық негізсіз талап қоюға жол берілмеуі; тарифтік әдістемелер мен Денсаулық сақтау министрлігінің нормативтік актілерін қатаң сақтау қажеттілігі.
«Мұндай даулар бизнесті белгісіздік пен қаржылық тәуекел жағдайында қалдырмауы тиіс. Кәсіпкерлер мемлекеттік тапсырыс жүйесінің ашықтығына және болжамдылығына сенімді болуы қажет», – деді ШҚО Кәсіпкерлер палатасының құқықтық мәселелер жөніндегі директордың орынбасары Айжан Жангирханова.
Шығыс Қазақстан облысының Кәсіпкерлер палатасы медициналық ұйымдардың өтініштерін әрі қарай да сүйемелдейді және МӘМС саласындағы құқық қолдану практикасын бақылауды жалғастырады. Ұқсас талаптармен бетпе-бет келген барлық клиникалар кеңес пен құқықтық қолдау үшін Палатаға жүгіне алады.
Пікір қалдыру:
Пікірлер: